Нумаях пулмасть районти Культура ҫуртӗнче кадет класӗсен хор коллективӗсен фестивалӗ иртнӗ. Ӑна Комсомольски 1-мӗш вӑтам шкулӗ йӗркеленӗ.
Фестивале Комсомольски 1-мӗш, Комсомольски 2-мӗш вӑтам шкулӗсен, Шӑнкӑртамри Э.З.Феизов профессор ячӗллӗ вӑтам шкулӑн (Патӑрьел округӗ), Ҫӗрпӳри В.М.Воротников ячӗллӗ 2-мӗш вӑтам шкулӑн, Кӳкеҫ лицейӗн (Шупашкар округӗ), Тӑрмӑш (Тӑвай округӗ), Ухман (Канаш округӗ) тата Калинино (Вӑрнар округӗ) вӑтам шкулӗсен хор коллективӗсем хутшӑннӑ.
Муниципаллӑ округ пуҫлӑхӗ Н.Н.Раськин, администрацин вӗренӳ пайӗн начальникӗ Н.А.Комиссарова, Комсомольски 1-мӗш вӑтам шкулӗн директорӗ И.А. Соловьева, Комсомольски тата Елчӗк округӗсемпе ӗҫлекен ҫар комиссарӗ С.Ю.Данилов, ЧР тава тивӗҫлӗ культура ӗҫченӗ С.В.Печникова пуҫтарӑннисене саламлӑ сӑмахсем каласа пурне те сцена ҫинче хӑйсен пултарулӑхне туллин кӑтартса пама суннӑ.
Хор коллективӗсем Раҫҫей, Аслӑ Отечественнӑй вӑрҫӑ, вырӑс салтакӗсем, офицерсем тата кадетсем ҫинчен юрӑсем шӑрантарнӑ. Патриотла юрӑсем мӑнаҫлӑн та мухтавлӑн зал тӑрӑх юхнӑ.
Фестивальте чи маттуррисене палӑртса дипломсемпе чысланӑ. 1-мӗш степеньлӗ лауреат ятне Ҫӗрпӳри В.М.Воротников ячӗллӗ 2-мӗш вӑтам шкулӑн команди тивӗҫнӗ. 2-мӗш степеньлӗ диплом хуҫисем — Комсомольски 2-мӗш тата Ухман вӑтам шкулӗ-сен, Шӑнкӑртамри Э.З.Феизов профессор ячӗллӗ вӑтам шкулӑн коллективӗсем. Комсомольски 1-мӗш тата Калинино вӑтам шкулӗсен, Кӳкеҫ лицейӗн тата Тӑрмӑш вӑтам шкулӗн хор коллективӗсем 3-мӗш степеньлӗ дипломсене тивӗҫнӗ.
Фестивале йӗркелекенсем спонсорсене% «Комплекс» строительство фирмин директорне В.Н.Гордеева, «Чувашская мечта» СППК председательне О.В.Кашкарова, «Энергия» НПО тӗп инженерне А.Н.Родионова, Н.А.Яковлев уйрӑм предпринимателе, ҫавӑн пекех уява йӗркелеме пулӑшнӑ волонтерсене тата активистсене чӗререн тав тӑваҫҫӗ.
Наталья МЕДВЕДЕВА.