Сентябрӗн 14-мӗшӗнче «Кӗтне» физкультурӑпа спорт комплексӗнче пӗртӑван Зубаревсене халалланӑ спорт фестивалӗ иртрӗ.
Ку фестивале кашни ҫулах паллӑ ентешсене — полиатлонпа ветерансем хушшинчи Раҫҫей чемпионне Сергей Зубарева тата республикӑра иртнӗ нумай спорт ӑмӑртӑвӗсен призерне Юрий Зубарева халалласа ирттереҫҫӗ. Ӑмӑртӑва ҫулсерен спорта юратакансем йышлӑн пуҫтарӑнаҫҫӗ. Кӑҫал та унта спорт ветеранӗсем ҫеҫ мар, округри шкулсенче пӗлӳ илекенсем те кӑмӑлтан тупӑшрӗҫ.
Мероприятие округ администрацийӗн пуҫлӑхӗн ҫумӗн тивӗҫӗсене пурнӑҫлакан Фарад Зейнетдинов, ЧР спорт ветеранӗсен канашӗн председателӗ, «Россия» спорт обществин Чӑваш Енри уйрӑмӗн председателӗ, ЧР тава тивӗҫлӗ физкультурӑпа спорт ӗҫченӗ Василий Шоркин, «Кӗтне» спорт шкулӗн директорӗн тивӗҫӗсене вӑхӑтлӑх пурнӑҫлакан Петр Порядков, спорт ветеранӗ Василий Пундяков, ӗҫпе вӑрҫӑ, хӗҫ-пӑшаллӑ вӑйсен тата право сыхлавӗн органӗсен ветеранӗсен районти канашӗн председателӗ Юрий Тимофеев, Сергей Зубаревӑн хӗрӗ, РФ таможня службин полковникӗ Светлана Логинова (Зубарева) хутшӑнчӗҫ. Вӗсем пурне те ӑнӑҫлӑн старта тухма, лайӑх кӑтартусем тума сунчӗҫ.
100 метра чупса ача садне ҫӳрекенсем хушшинче Екатерина Юманкина («Радуга» ача сачӗ) тата Азат Закиров («Лейсан» ача сачӗ) мала тухрӗҫ.
Ҫӑмӑл атлетика троеборйинче тӗрлӗ ӳсӗмсенче Карина Ильина, Оксана Иванова, Гульгена Феткуллина, Ирек Бетертдинов, Михаил Фролов, Алексей Гаврилов, Алексей Самаркин, Николай Мамуткин, Василий Пундяков ҫӗнтерчӗҫ.
Футболла выляса Канаш округӗн команди мала тухрӗ, иккӗмӗш вырӑнта — Комсомольски округӗн команди.
Волейбол вӑййинче Йӗпреҫ округӗн команди ҫӗнтерӳҫӗ пулса тӑчӗ, Комсомольски округӗн команди иккӗмӗш вырӑн йышӑнчӗ.
Ҫӗнтерӳҫӗсемпе призерсене медальсемпе, грамотӑсемпе тата хаклӑ парнесемпе чысларӗҫ.
Ирина ИЛЬИНА.