Иртнӗ эрнере муниципаллӑ округӑн ларусем ирттермелли залӗнче ветерансен совечӗн анлӑ пленумӗ пулса иртнӗ. Унта Аслӑ Отечественнӑй вӑрҫӑра Ҫӗнтерӳ тунӑранпа ҫитес ҫул 80 ҫул ҫитнине паллӑ тӑвас енӗпе хатӗрленӳ ӗҫӗсем тӑвас ыйтӑва пӑхса тухнӑ. Ҫавӑн пекех ветерансен организацийӗ ятарлӑ ҫар операцине хутшӑнакансене гуманитарлӑ пулӑшу парасси ҫинче те чарӑнса тӑнӑ. Сӑмах Ваттисен кунӗ ирттересси пирки те пынӑ.
Округри ветерансен совечӗн председателӗ Ю.С.Тимофеев малтан анлӑ доклад туса панӑ. Ӑна сӳтсе явнӑ май унӑн ҫумӗ В.И.Пундяков, РФ шалти ӗҫсен министерствин округри ветерансен совечӗн председателӗ П.В.Лапшин, Германире тата Варшава договорне кӗрекен ҫӗршывсенче службӑра пулнӑ ветерансен совечӗн председателӗ Н.И.Смирнов, «Искра» колхозри ветерансен совечӗн вырӑнти председателӗ, «Единая Россия» партин ӗҫ тӑвакан секретарӗ Л.М.Макарова, Агропромышленность отраслӗнче тӑрӑшнӑ ветерансен союзӗн ертӳҫи И.Х.Миннетуллин, «Морское братство» союзӗн ветеранӗсен председателӗ Е.А.Орешкин, муниципаллӑ округ пуҫлӑхӗн ҫамрӑксен ыйтӑвӗсемпе ӗҫлекен советникӗ О.П.Григорьева тата ыттисем те сӑмах илсе калаҫнӑ.
Округ пуҫлӑхӗ Н.Н.Раськин ветерансен юхӑмне тата округӑн обществӑлла пурнӑҫне хастар хутшӑнакан хисеплӗ ҫынсене Л.К.Кокшинӑна, Э.Г.Ильязова, В.Т.Яковлевӑна, Л.М.Тихоновӑна, Л.М.Макаровӑна, А.Ф.Волкова, В.Н.Курицинӑна Комсомольски районӗ 85 ҫул тултарнӑ ятпа кӑларнӑ медальпе наградӑланӑ. М.В.Мокеева, З.В.Киргизова муниципаллӑ округӑн Хисеп грамотине тивӗҫнӗ.
Ю.С.Тимофеев Чӑваш Республикинчи ветерансен совечӗн Хисеп грамотисемпе И.Н.Долговӑна, П.В.Лапшина, И.Х. Миннетуллина, Е.А.Орешкина, Н.И.Смирнова, Т.М.Казаковӑна чысланӑ.
Округри ветерансене тӑван тӑрӑха аталантарасси пӑшӑрхантарать.
Юрий Гаврилов.