Урмаел территори уйрӑмӗ — округра чи пысӑккисенчен пӗри. Вӑл Урмаел тата Тукай Мишер ялӗсене пӗрлештерсе тӑрать. Иккӗшӗнче те тутарсем пурӑнаҫҫӗ. Территори уйрӑмне Айрат Гаязтдинович Ямалетдинов ертсе пырать.
2024 ҫулхи январӗн 1-мӗшӗ тӗлне Урмаелӗнче 918 хуҫалӑх, Тукай Мишер ялӗнче 462 хуҫалӑх шутланнӑ. Вӗсенче пурӗ 5185 ҫын пурӑнать, Урмаелӗнче — 3260 ҫын, Тукай Мишерте — 1925 ҫын. Демографи лару-тӑрӑвӗпе ку территори уйрӑмӗ округра ҫеҫ мар, республика шайӗнче те чи лайӑххисенчен пӗри. Кунта ача ҫураласлӑхӗ вилекенсенчен ытларах. Акӑ, иртнӗ ҫул территори уйрӑмне кӗрекен ялсенче 48 ача кун ҫутине килнӗ, 41 ҫын вилнӗ.
Айрат Ямалетдинов,
Урмаел территори уйрӑмӗн начальникӗ:
— Территори уйрӑмӗн администрацине ҫынсем чылай ыйтупа килеҫҫӗ. Вӗсем хушшинче ҫӗрпе ҫыхӑннисем те, ҫулсене йӗркене кӗртессипе те, урамсене ҫутӑпа тивӗҫтересси пирки те пур, хуҫасӑр йытӑсене хирӗҫ кӗрешме те ыйтаҫҫӗ. Эпир мӗн май килнӗ таран вӗсене татса пама тӑрӑшатпӑр.
Юлашки вӑхӑтра, пирӗн пурнӑҫа Интернет вӑйлӑран та вӑйлӑрах кӗрсе пынӑ тапхӑрта, специалистсен ӗҫӗ татах та нумайланчӗ. Документсене хут ҫине ҫырнипе пӗрлех вӗсене сайтсем ҫине те вырнаҫтармалла. Кӑтартусене электронлӑ майпа хатӗрлемелле.
Ҫапах та территори уйрӑмӗн администрацийӗн тӗп ӗҫӗ вырӑнти инфраструктурӑна аталантарасси пулса тӑрать. Ялсене аталанма, вӗсене тирпей-илем кӗртме пире пуҫаруллӑ проектсемпе усӑ курни нумай пулӑшать. Акӑ, пӗлтӗр пуҫаруллӑ бюджет укҫи-тенкипе чылай ӗҫ пурнӑҫлама май килчӗ. Урмаелӗнчи Полевая урамра 625576 тенкӗлӗх, республика пӗлтерӗшлӗ ҫултан Бауман урамӗнчи Кара Булат мечет патне ҫитиччен 749963 тенкӗлӗх, Горная урамра 592731 тенкӗлӗх, Бауман урамӗнче 3490889 тенкӗлӗх ҫулсене юсанӑ. Ҫулсемпе ҫыхӑннӑ ӗҫсенех Тукай Мишер ялӗнчи Ленин тата Молодежная урамӗсенче 1648708 тенкӗлӗх, Зеленая урамра 2910597 тенкӗлӗх, Полевая урамра 537219 тенкӗлӗх пурнӑҫланӑ. Садовая урамра водопровода юсама 480380 тенкӗ укҫа-тенкӗ кайнӑ.
Комплекслӑ строительство ӗҫӗсем тӑвассин программипе Урмаелӗнчи Пионерская, Северная урамсене электроэнерги тата ҫутҫанталӑк газӗ кӗртес енӗпе те тӑрӑшнӑ.
Кӑҫал пуҫаруллӑ бюджет укҫи-тенкипе Урмаелӗнчи Центральная тата Бауман урамӗсем хушшинчи тӑкӑрлӑкра 6538930 тенкӗлӗх, Садовая урамра 1897017 тенкӗлӗх ҫулсене юсама палӑртатпӑр. Урмаелӗнчи тата Тукай Мишерӗнчи шыв уҫламалли башньӑсенче те юсав ӗҫӗсем ирттермелле.
2023 ҫулта Урмаел ялӗн ҫурҫӗр-хӗвелтухӑҫ енче тата пилӗк урам (Нурла, Фарит Гибатдинов, Радужная, Ришат Гибатдинов, Восточная) пуласси ҫинчен йышӑну тунӑ. Унта та комплекслӑ строительство ӗҫӗсем пуҫланӗҫ.
Пирӗн халӑх пуҫаруллӑ. Мӗн те пулин тумалла пулсан пулӑшма яланах хатӗр. Халӑхпа ӗҫлеме, вӗсен шухӑш-кӑмӑлне пӗлсе тӑма вырӑнти старостӑсем чылай пулӑшу параҫҫӗ. Урмаелӗнчи Имаметдин Насртдинович Кумтовпа, Тукай Мишерӗнчи Минехалим Абзалович Садртдиновпа тӑтӑшах тӗл пулса калаҫатпӑр, ялсен пурнӑҫӗпе ҫыхӑннӑ ыйтусене сӳтсе яватпӑр.
Пирӗн тӑрӑхри ҫынсем яла юлса аталантарасшӑн, тирпей-илем кӗртесшӗн. Ку енӗпе патшалӑхӑн тӗрлӗ программипе проекчӗсене хутшӑнса вӑл паракан пулӑшусемпе туллин усӑ курма тӑрӑшатпӑр.