Июль уйӑхӗ тӗрлӗ уявсемпе пуян. Вӗсенчен пӗри — Потребительсен кооперацийӗн кунӗ. Пирӗн округра ӑна ҫулсерен анлӑн та хаваслӑн ирттереҫҫӗ. Кӑҫал та ҫак уяв умӗн райпо тытӑмӗнче тӑрӑшакансем тата ветерансем савӑнӑҫлӑ мероприятие пуҫтарӑннӑ.
Муниципаллӑ округ пуҫлӑхӗ Николай Раськин кооператорсене саламласа малашне те халӑха пахалӑхлӑ пулӑшусем кӳрес тесе ырми-канми тӑрӑшма, профессире ҫитӗнӳсем туса пыма суннӑ. Вӑл нумай ҫул ҫак ӗҫре тӑрӑшакансене потребительсен кооперацине аталантарас ӗҫе пысӑк тӳпе хывнӑшӑн тав туса Хисеп грамотисем панӑ.
Комсомольски райпо Канашӗн председателӗ Светлана Грачева та пуҫтарӑннисене ӑшшӑн саламланӑ. Райпо тытӑмӗ лайӑх ӗҫлесе пынинче, паллах, унӑн ӗҫченӗсем пысӑк вырӑн йышӑнаҫҫӗ. Уявра «Хлебозавод» ООО пекарьне Елена Тихоновӑна — «Потребительсен кооперацийӗн тава тивӗҫлӗ ӗҫченӗ» хисеплӗ паллӑпа, «Торговый дом» ООО фармацевтне Евгения Яковлевӑна — РФ Центросоюзӑн Хисеп грамотипе, «Торговый дом» ООО сутуҫине Екатерина Шабановӑна — Чӑвашпотребсоюзӑн Хисеп грамотипе, «Техник» ООО водительне Алексей Толстова — Чӑвашпотребсоюзӑн Тав хучӗпе наградӑланӑ. «Хлебозавод» ООО пекарьне Юлия Ивановӑна Чӑвашпотребсоюзӑн Хисеп хӑми ҫине кӗртнӗ.
«Шемуршинский коопторг» ООО директорӗ Марина Родионова, «Техник» ОООн тӗп бухгалтерӗ Ирина Потапова, «Мир продуктов» магазин сутуҫи Галина Андреева, «Комбинат питания» ООО технологӗ Фенисе Габдуллова, райпон ветеринари фельдшерӗ Лилия Гибатдинова райпон Хисеп грамотине тивӗҫнӗ. Ҫавӑн пекех тата ытти пултаруллӑ ӗҫченсене райпон Тав хучӗсемпе тата профсоюзӑн Хисеп грамотисемпе наградӑланӑ. Уява пуҫтарӑннисем савӑнӑҫлӑ концерт курса киленнӗ.
Гелия ГИНАТУЛЛИНА.