Нумаях пулмасть «Кӗтне» физкультурӑпа спорт комплексӗнче ҫамрӑксем хушшинче армрестлинг енӗпе Чӑваш Республикин ӑмӑртӑвӗ иртрӗ. Унта пирӗн округ спортсменӗсем ҫеҫ мар, республикӑн тӗрлӗ кӗтесӗсенчен пуҫтарӑннӑ яшсемпе хӗрсем тупӑшрӗҫ.
16—18 ҫулсенчи хӗрсем хушшинче тӗрлӗ виҫесенче Кристина Якимова (Елчӗк округӗ), Ксения Морозова (Шупашкар округӗ), Анастасия Тихонова (Елчӗк округӗ), Эльвина Сафина (Патӑрьел округӗ), Кристина Жирнова (Елчӗк округӗ), Эльвина Земдиханова (Патӑрьел округӗ), Анастасия Краснова (Тӑвай округӗ) мала тухса пьедесталӑн чи ҫӳллӗ картлашкине хӑпарчӗҫ.
Ҫак ӳсӗмри каччӑсем хушшинче Ярослав Тихонов (Елчӗк округӗ), Линар Искиндаров (ЧПУ), Егор Иванов (Патӑрьел округӗ), Никита Гурьев (ЧПУ), Дмитрий Прохоров (Патӑрьел округӗ), Илья Петров (Шупашкар округӗ), Роберт Шакуров (Патӑрьел округӗ), Станислав Яковлев (ЧПУ) пурне те парӑнтарса ҫӗнтерӳҫӗ ятне тивӗҫрӗҫ.
Командӑсене илес пулсан 1-мӗш вырӑна Патӑрьелсем тухрӗҫ, иккӗмӗшпе виҫҫӗмӗш вырӑнсене Елчӗксемпе Комсомольскисем пайларӗҫ.
Тепӗр ушкӑнра та — 19—21 ҫултисем хушшинче — тупӑшу хӗрӳ иртрӗ. Каччӑсенчен Линар Искиндаров (ЧПУ), Владислав Михайлов (ЧПУ), Нияз Тазюков (Патӑрьел округӗ), Лев Афанасьев (Патӑрьел округӗ), Михаил Кокоулин (Политехника колледжӗ), Семен Лучков (ЧПУ), Нияз Шакуров (Патӑрьел округӗ), Станислав Яковлев (ЧПУ) чи маттуррисем пулчӗҫ.
Ҫак ӳсӗмри хӗрсем хушшинче Александра Швешкеева (Хӗрлӗ Чутай округӗ), Анастасия Тихонова (Елчӗк округӗ), Эльвина Сафина (Патӑрьел округӗ), Кристина Жирнова (Елчӗк округӗ), Мария Малова (ЧПУ), Мария Смирнова (Комсомольски округӗ) пурне те парӑнтарчӗҫ.
Командӑсем хушшинче вара И.Ульянов ячӗллӗ Чӑваш Патшалӑх университетӗнчен килнӗ спортсменсем мала тухрӗҫ. Иккӗмӗш вырӑнта — Патӑрьел округӗн, виҫҫӗмӗш вырӑнта — Комсомольски округӗн командисем.
Абсолютлӑ виҫере хӗрсенчен Патӑрьел округӗнчен килнӗ Эльвина Земдиханова чемпионка пулса тӑчӗ. Яшсенчен вара ЧПУ студенчӗ Станислав Яковлев ҫӗнтерчӗ.
Ӑмӑртура мала тухнисене пурне те грамотӑсем тата медальсем парса чысларӗҫ.
Петр ПОРЯДКОВ.