Тавралӑх юртан тасалса пӗтнӗпе пӗрех. Ҫиеле тасамарлӑх, типӗ курӑксем, туратсемпе ҫулҫӑсем тухаҫҫӗ. Ҫанталӑк та ӑшӑтса пырать. Апла пулсан пушар енчен хӑрушлӑх тухса тӑма пултаракан тапхӑр пуҫланать.
Ҫак кунсенче 31-мӗш номерлӗ пушар чаҫӗн начальникӗ И.В.Ананьев тата 9-мӗш пушарпа ҫӑлав отрячӗн пушар сӳнтерекен службӑн смена начальникӗн ҫумӗ А.Н. Исаков округри территорисенчи пушар сыхлавӗн 8 подразделенине ҫитсе курнӑ, унти лару-тӑрупа паллашнӑ.
«Труд» ял хуҫалӑх кооперативӗнчи ирӗклӗ пушар хуралӗн ГАЗ никӗсӗ ҫине вырнаҫтарнӑ 2 автоцистерна пур. Хуҫалӑх ертӳҫи А.С.Лукиянов вӗсем юсавлӑ пулнине палӑртнӑ. Кунти ӗҫченсем ялта е кӳршӗ ялта вут-кӑвар сиксе тухсан ҫула тухма яланах хатӗр тӑраҫҫӗ. Иртнӗ ҫул депора юсав ӗҫӗсем туса ирттернӗ. Техника ӑшӑ гаражра тӑрать, ҫакӑ кирек мӗнле ҫанталӑкра та ӑна ҫӑмӑллӑнах хускатма май парать. Вут-ҫулӑм сиксе тухсан пушар машинисене шыв тултарма май паракан вырӑнсене те йӗркене кӗртнӗ.
Пушар сӳнтерекен автомашинӑсем пулсан та халӑхӑн та вут-кӑварпа усӑ курнӑ чухне асӑрхануллӑ пулмалла, пушар хӑрушсӑрлӑхӗн правилисене ҫирӗп пӑхӑнмалла.
Иван Ананьев.