Пирӗн округра пурӑнакансем ятарлӑ ҫар операцине хутшӑнакансене пулӑшас енӗпе малалла ӗҫлеҫҫӗ. Пултаруллӑ волонтерсем маскировка сеткисем ҫыхаҫҫӗ, дронсенчен сыхланма май паракан утиялсем ҫӗлеҫҫӗ, окоп ҫуртисем тӑваҫҫӗ, ыркӑмӑллӑх акцийӗсем йӗркелесе тӗрлӗ япаласем пуҫтарса аякри ентешӗсене пулӑшма ӑсатаҫҫӗ.
Ҫак кунсенче округ пуҫлӑхӗ Н.Н.Раськин, Комсомольски тата Елчӗк округӗсен ҫар комиссарӗн ӗҫӗсене вӑхӑтлӑх пурнӑҫлакан Р.Р.Феткуллин «Хамӑрӑннисене пӑрахмастпӑр» волонтерсен юхӑмне хастар хутшӑнакан Ирина Шипатовӑна Хисеп грамоти парса чысланӑ. Ирина Ивановна — ҫӗвӗҫ. Вӑл округра пурӑнакансене тӑхӑнмалли япаласене юсаса, ҫӗлесе панипе пӗрлех ятарлӑ ҫар операцине хутшӑнакансене пулӑшма та вӑхӑт тупать. Ӑна округри ыркӑмӑллӑх ӗҫӗсене тата обществӑлла пурнӑҫне хастар хутшӑннӑшӑн тав сӑмахӗ каланӑ.
(ХАМӐР ИНФ.).