Ачасем ҫуллахи каникул кунӗсенче канаҫҫӗ, вӗрентекенсем вара яланах шыравра. Вӗсем пӗр-пӗрин опычӗпе паллашаҫҫӗ, хӑйсен ӑсталӑхне ӳстермелли ҫул-йӗр шыраҫҫӗ, пултарулӑхне тӗрлӗ конкурссенче тӗрӗслеҫҫӗ.
Комсомольски 1-мӗш вӑтам шкулӗнчи П.В.Родионов, А.Р.Пахалов Куславкка округӗнчи Елчӗк вӑтам шкулӗн никӗсӗ ҫинче иртнӗ регионсем хушшинчи «Образовательный драйв 2.0» фестивале хутшӑннӑ. Республикӑри тата унӑн тулашӗнчи 8 муниципалитетри 60 ытла хастар педагогпа пӗрле вӗсем РФ Президенчӗн «Россия — страна возможностей» платформипе ирттерекен «Флагманы образования» проекта пурнӑҫламалли майсене сӳтсе явнӑ. Ҫавӑн пекех профессилле конкурссенче тупӑшнӑ. Тӗрлӗ регионсенчи ӗҫтешӗсен вӗренӳ ӗҫӗнчи ҫӗнӗлӗхӗсемпе паллашнӑ. Комсомольски 1-мӗш вӑтам шкул вӗрентекенӗсем конкурссенче палӑрса наградӑсене тивӗҫнӗ.
Вӗрентекенсем ҫӗнӗлӗхсем шырани, округри вӗрентӳ ӗҫне тӗрлӗ ҫӗрте паллаштарни, хӑйсем те ӑсталӑха ӳстерсе пыни савӑнтарать. Малашне те вӗсен ҫитӗнӳсем пулччӑр.
Ирина Соловьева.