Иртнӗ эрнекун Комсомольскинчи культура ҫуртне пыракансене хаваслӑ юрӑ-кӗвӗпе кӗтсе илнӗ. Кунта Медицина ӗҫченӗсен кунне савӑнӑҫлӑ лару-тӑрура паллӑ тунӑ. Уяв «Люди в белых халатах» юрӑпа уҫӑлнӑ. Вӑл паянхи кун сывлӑх сыхлавӗнче ӗҫлекенсемпе нумай ҫул ҫак сферӑра тӑрӑшнӑ ветерансене тав туни, вӗсем пархатарлӑ та хисеплӗ ӗҫре тӑрӑшнине палӑртнин палли пулнӑ. Медицина учрежденинче тӑрӑшакансем пуриншӗн те сӑваплӑ ӗҫ тӑваҫҫӗ, сывлӑх хуралӗнче тӑраҫҫӗ.
Уява Комсомольски тӗп больницин ертӳҫи И.И.Ефремова уҫнӑ. Пуҫтарӑннисене уяв ячӗпе саламласа тав сӑмахӗ каланӑ. Салам сӑмахӗсемпе округ пуҫлӑхӗ Н.Н.Раськин, округри депутатсен Пухӑвӗн председателӗн ҫумӗ В.В.Кополухин, медицина ӗҫченӗсен профсоюз комитечӗн пуҫламӑш организацийӗн председателӗ Т.П.Миговорова сӑмах илнӗ. Вӗсем медицина ӗҫченӗн профессийӗ ҫынсене пулӑшас, вӗсемшӗн чи хаклине — сывлӑхне — сыхлас тӗллевлӗ пулнине палӑртса малашне те вӗсене ӑнӑҫусем суннӑ.
Сывлӑх сыхлавӗнче тӑрӑшакансем кашниех тав сӑмахне тивӗҫлӗ. Чи хастаррисене, суйласа илнӗ ӗҫе чӗререн парӑннисене тӗрлӗ шайри наградӑсемпе чысланӑ. Тӗп больницӑн стоматологи уйрӑмӗн шӑл врачне Р.Ш.Измайловӑна тата врач-эндокринолог кабинечӗн медицина сестрине Н.Е.Красновӑна Раҫҫей Федерацийӗн сывлӑх сыхлав министерствин, клиникӑпа диагностика лабораторийӗн заведующине, клиника диагностикин врачне Р.Н.Акшовӑна, тӗп больницӑн йышӑну уйрӑмӗн медицина сестрине Т.П.Миговоровӑна Чӑваш Республикин сывлӑх сыхлавӗн министерствин Тав хучӗсемпе наградӑланӑ.
Паллиативлӑ медицина пулӑшӑвӗн палатӑри медицина сестри Д.М.Елелеева, терапи уйрӑмӗн заведующийӗ, врач-терапевт Н.В.Ефремова, эндоскопи кабинечӗн медицина сестри Л.С.Медведева, терапи уйрӑмӗнчи палата медицина сестри А.С.Смирнова, хирурги уйрӑмӗн производство тата служба пӳлӗмӗсене тасатса тӑракан Л.Н.Чукмарева, инфекци уйрӑмӗн палатӑри медицина сестри Р.Е.Шакмакова округ администрацийӗн Хисеп грамотисене тивӗҫнӗ.
Чӑваш Республикин Патшалӑх Канашӗн Тав ҫырӑвӗсем парса анестезиологипе реанимаци уйрӑмӗн аслӑ медицина сестрине А.Г.Абдрахмановӑна, ҫак уйрӑмри медицина сестрине С.В.Горшковӑна чысланӑ.
Комсомольски тӗп больницин администрацийӗн Хисеп грамотисемпе паллиативлӑ медицина пулӑшӑвӗн палатӑри медицина сестрине А.Р.Алиуллинана, Шурутри пӗтӗмӗшле практика врач уйрӑмӗн медицина сестрине А.В.Егоровӑна, хирурги уйрӑмӗн палатӑри медицина сестрине И.Г.Никитинана наградӑланӑ.
Сывлӑх сыхлавӗнче ӗҫлекенсен Чӑваш Республикинчи профсоюз комитечӗн Хисеп грамотисене терапи уйрӑмӗн палатӑри медицина сестрине Д.В.Гималеевӑна, клиникӑпа диагностика лабораторийӗн лаборатори техникне С.Н.Никандрова, Ҫӗнӗ Шӑхранти фельдшерпа акушер пункчӗн заведующине Н.Э.Семенова панӑ.
Хирти Сӗнтӗрти фельдшерпа акушер пунктӗнче ӗҫлекен В.В.Быкова фельдшера «Профессия в объективе», Кайнлӑкри фельдшерпа акушер пунктӗнчи И.Ф.Алякинӑна тата Ҫӗнӗ Сӗнтӗр фельдшерпа акушер пунктӗнчи И.А.Тимофеевӑна «Мой ФАП — лучший» республикӑри конкурссене хутшӑннӑ ятпа саламланӑ.
Сывлӑх сыхлавӗн ветеранӗсен ячӗпе нумай ҫул район больницине ертсе пынӑ М.И.Федорова сӑмах илсе каланӑ, уяв ячӗпе саламласа тав тунӑ.
Сывлӑх сыхлавӗн ӗҫченӗсемпе ветеранӗсене чӑваш эстрадин ҫӑлтӑрӗсем Денис Павловпа Сергей Лекеров хаваслӑ юрӑсемпе савӑнтарнӑ.
Юрий ГАВРИЛОВ.