Кӑҫал ачасемпе ҫамрӑксен медиа пултарулӑхӗн «МедиаВзлет» регионсем хушшинчи фестивалӗ тӑваттӑмӗш хут иртнӗ. Муркаш муниципаллӑ округӗнчи «Лесная сказка» санатори никӗсӗ ҫинче йӗркеленӗ вӗрентӳ лаптӑкне ҫӗршыври 34 регионти 300 яхӑн ҫамрӑк журналистпа блогер килсе ҫитнӗ. Регионсем хушшинчи фестивале Чӑваш Республикин Пуҫлӑхӗ Олег Николаев ҫитсе курнӑ. Вӑл ачасемпе ҫамрӑксене творчествӑра ҫитӗнӳсем тума ӑнӑҫу суннӑ. Виҫӗ куна пынӑ «МедиаВзлет» фестивале пирӗн округри Нӗркеҫ вӑтам шкулӗнчи Анастасия Порядкова, Арсений Плеткин, Виктория Нестерова тата Кирилл Соловьев хутшӑнчӗҫ.
«Ачасене питӗ килӗшнӗ. Пӗтӗм Раҫҫей шайӗнчи фестиваль ҫӗршер ачана пӗр йыша пухнӑ. Вӗсем тӗрлӗ пултарулӑх лапамӗсене ҫитсе унти ӗҫ-пуҫпа паллашнӑ, тӗрлӗ халӑх ачисемпе калаҫнӑ, паллашнӑ, пӗр чӗлхе тупнӑ. Ачасене ытларах «Телесуфлер» мастер-класс тата «Личностный рост» лапам кӑмӑлӗсене кайнӑ. Ку фестивале хутшӑнни вӗсене журналистикӑн тата блогерсен ӗҫӗсен вӑрттӑнлӑхӗсене пӗлме, тавракурӑмне ӳстерме пулӑшатех. Вӗренекенсем унта ҫитес ҫул та кайма ӗмӗтленеҫҫӗ», — пӗлтерчӗ Нина Ивановна Плеткина вӗрентекен.
Фестивале хутшӑнакансем виҫӗ кун хушшинче 100 ытла творчество ӗҫӗ хатӗрленӗ. Вӗсем хушшинче социаллӑ реклама, кинофильмсем, мультипликаци фильмӗсем, блогингсем те пулнӑ. «Кино», «Мультипликация», «Тележурналистика», «Фотография», «Операторское мастерство», «Личностный рост», «Блогинг», «Печатная журналистика», «Игротехника» лапамсенче йӗркеленӗ мастер-классем ачасемпе ҫамрӑксене журналистикӑпа блогер ӗҫӗсемпе тӗрлӗ енлӗн паллаштарнӑ.
Нӗркеҫ тӑрӑхӗнчен чӑваш литературипе журналистикинче паллӑ йӗр хӑварнӑ ҫынсем чылайӑн тухнӑ. Регионсем хушшинчи «МедиаВзлет» фестивале ҫитсе курни, унти ӑсталӑх класӗсенче туптанӑ пӗлӳ, тен, ачасен пурнӑҫне творчествӑпа ҫыхӑнтарма хавхалантарӗ.
Надежда ПЕТРОВА.