Иртнӗ шӑматкун «Кӗтне» ФСКра чаплӑ спорт уявӗ — ӗҫ коллективӗсем хушшинчи ГТО фестивалӗ иртрӗ. Ӑна «Спорт — пурнӑҫ норми» патшалӑх программипе килӗшӳллӗн йӗркеленӗ. Фестивале округри организацисенче, тӗрлӗрен учрежденисенче вӑй хуракансем йышлӑн хутшӑнчӗҫ.
Ӑмӑртура 18 ҫултисенчен пуҫласа 64 ҫул таранхисем тупӑшрӗҫ. Пурӗ 15 организацирен килнӗ 132 участник старта тӑрса вӗсем хӑйсен ӗҫӗнче ҫеҫ мар, спортра та маттур пулнине кӑтартса пачӗҫ. Ҫак кун никам та кичемленсе лармарӗ. Пӗрисем нормативсене тултарнӑ вӑхӑтра теприсем вӗсене хавхалантарса тӑчӗҫ, чи лайӑх кӑтарту тӑвакансене алӑ ҫупса саламларӗҫ.
Кашни ӳсӗмрех ҫӗнтерӳҫӗсене палӑртрӗҫ. Ҫапла хӗрарӑмсем хушшинче Эндже Зарипова, Гелия Ибрагимова (иккӗшӗ те Тукай Мишер вӑтам шкулӗнчен), Екатерина Квасова (Кӗҫӗн Ҫӗрпӳел вӑтам шкулӗ), Алена Громова (Хирти Явӑш вӑтам шкулӗ), Елена Степанова, Венера Арсентьева, Галина Волкова (Комсомольски 2-мӗш вӑтам шкулӗнчен), Гульгена Феткуллина, Зоя Журавлева (Хирти Мӑнтӑр вӑтам шкулӗнчен), Рена Автономова (Комсомольски 1-мӗш вӑтам шкулӗ) чи маттуррисем пулчӗҫ. Арҫынсем хушшинче Николай Семенов (Комсомольскинчи тӗп больница), Сергей Наумов (Кӗҫӗн Ҫӗрпӳел вӑтам шкулӗ), Алексей Тихонов, Геннадий Ильдюхин, Вячеслав Мурзаев (Комсомольски 2-мӗш вӑтам шкулӗнчен), Наиль Зарипов (Тукай Мишер вӑтам шкулӗ), Виталий Автономов (Комсомольски 1-мӗш вӑтам шкулӗ) чи пысӑк пултарулӑхпа палӑрчӗҫ.
Командӑсен пӗрлештернӗ кӑтартӑвӗсем тӑрӑх Комсомольски 2-мӗш вӑтам шкулӗн команди ҫӗнтерӳҫӗ пулса тӑчӗ. Иккӗмӗш вырӑнта — Комсомольски 1-мӗш, виҫҫӗмӗшӗнче Урмаел вӑтам шкулӗсем.
ГТО фестивалӗ пирӗн округра спортпа туслӑ ҫынсем пурӑннине тепӗр хут ҫирӗплетрӗ. Уйрӑмах вӗренӳ учрежденийӗсенче тӑрӑшакансем унта активлӑн хутшӑнни вара педагогсем ачасене хӑйсен ырӑ тӗслӗхӗпе спортра пысӑк утӑмсем тума хавхалантарнине кӑтартса пачӗ.
Петр ПОРЯДКОВ.