Комсомольски вӑтам шкулӗсенче йӑлана кӗнӗ йӗркепе спорт мероприятийӗсем ирттересси тахҫанах вӑй илсе пырать. Хӑшӗсем волейбол, теприсем футбол, ҫӑмӑл атлетика, сӗтел ҫинчи теннис вӑййисем ирттереҫҫӗ.
Акӑ, декабрӗн 22-мӗшӗнче, Комсомольски 2-мӗш вӑтам шкулӗнче сӗтел ҫинчи теннис енӗпе икӗ вӑтам шкул пӗрле пысӑк спорт мероприятийӗирттерчӗҫ. Комсомольски 2-мӗш тата Тукай Мишер вӑтам шкулӗсенче вӗренекенсем хӑйсен пултарулӑхне кӑтартса пачӗҫ.
Ҫак спорт вӑййисене тивӗҫлӗрех йӗркелеме икӗ шкул учителӗсем сахалах мар вӑй хучӗҫ. Вӗсем% Комсомольски 2-мӗш, Тукай Мишер вӑтам шкулӗсен учителӗсем Федор Гаврилов, Ирек Минсафинов. Пӗри — рисовани, черчени, труд, тепри физкультура урокӗсенче ачасене тарӑн пӗлӳ парас тесе тӑрӑшать.
Ӑмӑртусене округри кашни вӑтам шкултан икӗ арҫын ача, 2 хӗрача хутшӑнать. Урӑхла каласан, спортсменсем юлташла тӗлпулусенче вӑй виҫеҫҫӗ.
Пӗрремӗш тытӑҫу Данил Шемекеевпа (Комсомольски) Айнур Садртдинов (Тукай Мишер) хушшинче пулчӗ. Шемекеев пултарулӑхпа палӑрчӗ — вӑйӑ вӑл ҫӗнтернипе вӗҫленчӗ. Тепӗр тытӑҫу — Илья Самаринпа (Комсомольски) Булат Хайруллин (Тукай Мишер). Тукай Мишер каччи ҫӗнтерӗве хӑй аллинчен вӗҫертмерӗ. Ҫапла вара арҫын ачасем хушшинчи тупӑшу 1:1 шутпа, никам ҫӗнтерейменнипе вӗҫленчӗ.
Пӗрремӗш парти Полина Романовӑпа (Комсомольски) Джамиля Зарипова хушшинче пулчӗ. Полина вӑйлӑраххине кӑтартса пачӗ. Тепринче Аэлита Митюковӑпа (Комсомольски) Хадиче Ямалутдинова (Тукай Мишер) вӑй виҫрӗҫ. Кунта вара Комсомольски 2-мӗш вӑтам шкулӗн вӗренекенӗсем Полинӑпа Аэлита хӑйсен пултарулӑхне уҫҫӑн кӑтартса пачӗҫ, иккӗшӗ те ҫӗнтерӳпе палӑрчӗҫ. Тытӑҫу 2:0 шутпа Комсомольскисем ҫӗнтернипе вӗҫленчӗ. Арҫын ачасемпе хӗрачасем сӗтел ҫинчи тытӑҫусенче 3:1 шутпа ҫӗнтерсе парнесене ҫӗнсе илчӗҫ.
Сӗтел ҫинчи теннис вӑййисем вӗҫленсен икӗ шкул команди пӗрле пуҫтарӑнса малашнехи утӑмсене палӑртрӗ, пӗрне-пӗри чысларӗ. Ф.Гавриловпа И.Минсафинов ачасен кунсеренхи ӗҫӗ-хӗлӗ пирки те чылай чарӑнса тӑчӗҫ.
Василий ГАВРИЛОВ.