Ҫанталӑк вылянса тӑрать пулсан та округри ял хуҫалӑх ӗҫченӗсем кашни уяр кунпа усӑ курса ҫӑвӗпе ҫитӗннӗ тухӑҫа пуҫтарса кӗртес тесе ырми-канми тӑрӑшаҫҫӗ.
Августӑн 26-мӗшӗ тӗлне пӗрчӗллӗ тата пӑрҫа йышши культурӑсене 6603 гектар ҫинчен пуҫтарса кӗртнӗ. Ку пӗтӗмӗшле лаптӑкӑн 55 проценчӗпе танлашать. Ҫав шутра тулла — 2875 гектар, урпана — 2652, ыраша — 55, сӗлле — 773, пӑрҫа йышши культурӑсене 248 гектар ҫинчен пуҫтарнӑ.
Хальлӗхе пурӗ 25350 тонна тырӑ пӳлмесене кӗнӗ. Вӑтам тухӑҫ кашни гектартан 38,5 центнерпа танлашать.
Хӑш-пӗр хуҫалӑхсенче вырмана вӗҫлеме те ӗлкӗрнӗ. Акӑ, «Искра» колхоз ӗҫченӗсем 380 гектар ҫинче ҫитӗнтернӗ пӗрчӗллӗ тата пӑрҫа йышши культурӑсене пӗтӗмпех ҫапса тӗшӗленӗ. Ку хуҫалӑхри тухӑҫ та пысӑк — кашни гектар пуҫне 43,5 центнер. Тата хӑш-пӗр хуҫалӑхсенче те тырпула пӗтӗмпех пуҫтарса кӗртнӗ, теприсенче вара пушанман хирсем нумай та юлман, вӗсенче те ӗҫ вӗрет. Апла пулсан, ҫывӑх вӑхӑтра вӗсем те вырма ӗҫӗсене вӗҫлӗҫ.
Минзаит ЗАЙНУЛЛИН.