Ҫанталӑк иртнӗ эрнере ӑшӑрах тӑчӗ пулин те йӗлтӗрҫӗсемшӗн ҫакӑ чӑрмав пулмарӗ. Округри спорта юратакансем Канаш хули ҫывӑхӗнчи вӑрман уҫланкинче Чӑваш республикин кубокӗн 3-мӗш тапхӑрӗн ӑмӑртӑвне хутшӑнчӗҫ. Тупӑшусем тӗрлӗ ҫулти ушкӑнсенче иртрӗҫ.
Ҫитмӗл ҫултан аслӑрах йӗлтӗрҫӗсем 3 ҫухрӑмлӑ дистанцире вӑй виҫрӗҫ. Кунта 9 минут та 8 ҫеккунт вӑхӑт кӑтартса Николай Ятманов 1-мӗш вырӑн йышӑнчӗ. Анатолий Давыдов иккӗмӗш вырӑна тухрӗ. 75 ҫултан аслӑраххисем хушшинче Николай Васильев 2-мӗш кӑтартупа палӑрчӗ.
Ҫамрӑкрах ӳсӗмри йӗлтӗрҫӗсенчен Владимир Калашников япӑх мар ӑмӑртрӗ. Ҫавӑн пекех пирӗн ентешсем Владислав Васильевпа Иван Симендеев 5 ҫухрӑмлӑ дистанцире пӗрремӗш тата иккӗмӗш вырӑнсем йышӑнчӗҫ.
Маттур йӗлтӗрҫӗсене ҫӗнтерӳпе саламлатпӑр, малашне те ӑнӑҫусем сунатпӑр.
Николай Ятманов.