Ҫулсерен ҫанталӑк сивӗтсен йӑлари электроприборсемпе усӑ курнипе ҫыхӑннӑ пушарсен шучӗ ӳсет. Кӑҫалхи октябрӗн 31-мӗшӗ тӗлне Комсомольскинчи 31-мӗш пушар чаҫӗн яваплӑхне кӗрекен территорире 21 хутчен пушар тухнине регистрациленӗ (пӗлтӗрхи ҫак тапхӑрта — 28), пушарта 1 ҫын вилнӗ. Статистика тӑрӑх, чылай чухне ҫын пурӑнакан сектора кӗрекен объектсенче вут-ҫулӑм алхасать.
Ӑшӑтмалли приборсемпе ӗҫленӗ чухне хӑрушсӑрлӑх ҫинчен яланах асра тытмалла. Ҫак ансат правилӑсене пӑхӑнни хӑвӑра тата ҫемьене инкекрен сыхлама пулӑшӗ:
— электропралуксен, розеткӑсен, щитоксен тата штепсельлӗ вилкӑсен юсавлӑхне тӗрӗслесех тӑмалла;
— хӑвӑр тӗллӗн ӑсталанӑ е сиенленнӗ ӑшӑтмалли хатӗрсемпе усӑ курмалла мар;
— тӳрех пысӑк хӑватлӑ темиҫе электроприбор ҫутса электросете ытлашши тиемелле мар;
— штекер розеткӑна лайӑх вырнаҫнине тӗрӗслемелле, унсӑрӑн ӑшӑтмалли хатӗр ытлашши хӗрсе кайса пушар кӑларма пултарать;
— электричествӑпа ӑшӑтакан хатӗрсене тата телефонсен заряд илмелли хатӗрӗсене ҫӗрӗпе сетьре хӑвармалла мар;
— ачасене ҫакӑн пек хатӗр- семпе ан выляттарӑр;
— ӑшӑтмалли хатӗре тусанран тасатсах тӑрӑр, тусан та пушар кӑларма пултарать;
— ӑшӑтмалли хатӗрӗн сеть пралукӗсене кавирсем айне ан хурӑр;
— электропралуксем ҫине йывӑр япаласем (сӑмахран, сӗ-телпукан) ан лартӑр, унсӑрӑн электроприбор хӗрсе кайса пушар кӑларма пултарать.
Сыхӑ пулни сирӗн тата ҫывӑх ҫынсен пурнӑҫне, пурлӑха упраса хӑварма пулӑшни ҫинчен нихӑҫан та ан манӑр. Вут-ҫулӑм тухас пулсан 01, 101 е 112 телефонсемпе шӑнкӑравласа пушар сӳнтерекенсене чӗнӗр.
Иван Ананьев,
Комсомольскинчи 31-мӗш пушар чаҫӗн начальникӗ.