Комсомольски райповӗнче тӑрӑшакансем хушшинче мӑшӑрлисем сахал мар пулнӑ. Вӗсенчен пӗрисем — Лепешкинсем. Антонина Ивановнӑпа Михаил Николаевич мӗн ҫамрӑкран унта ӗҫлеме пуҫланӑ та тивӗҫлӗ канӑва кайичченех суту-илӳ системинче вӑй хунӑ.
Совет ҫарӗнчен службӑран таврӑнса 1980 ҫулта М.Лепешкин райпона ӗҫлеме кӗнӗ. Унтах вӑл пулас мӑшӑрӗпе Шурут-Нурӑс хӗрӗпе Тоньӑпа паллашнӑ. 1985 ҫулта вӗсем пӗрлешсе ҫемье ҫавӑрнӑ, 2 ача ҫуратса ӳстерсе пурнӑҫ ҫулӗ ҫине кӑларнӑ. Халӗ вӗсем 4 мӑнукӗпе савӑнаҫҫӗ. Кӗскен вӗсем пирки ҫапла ҫеҫ калама пулать.
1980 ҫулсенче Комсомольски райповӗ республика шайӗнче ҫеҫ мар, Раҫҫей шайӗнче те кӗрлесе ҫеҫ тӑнӑ. Кунта ҫӗнӗрен-ҫӗнӗ магазинсем, производство уҫнӑ. Ҫавӑнпа та унта ӗҫлекенсене те ҫӑмӑл килмен. Райпо ертӳҫисем унта тӑрӑшакансенчен ҫирӗп ыйтнӑ.
«Миша тӑтӑшах инҫетри хуласенче командировкӑра пулатчӗ. Мускав, Саратов, Уфа, Самара, Челябинск тата ҫӗршыври ытти пысӑк хуласене ҫитетчӗ. Тепӗр чухне командировка пӗр-ик кун ҫеҫ пулман, эрнене, икӗ эрнене тӑсӑлатчӗ. Вӑл тӗрӗс-тӗкел ҫаврӑнса ҫиттӗр тесе мӗн чухлӗ пӑшӑрханман-ши?» — каласа парать Антонина Ивановна. Чӑннипе Михаил Николаевич райпо системинче 40 ытла ҫул ӗҫлесе ӑҫта кӑна ҫитмен-ши? Район халӑхне кирлӗ таварпа тивӗҫтерес тесе миҫе ҫӗр-пин километр хыҫа хӑварман-ши? Тӗрлӗ автомашинӑпа ӗҫлеме тӳр килнӗ ӑна. Хӑйне шанса панӑ техникӑна вӑл юсавлӑ тытнӑ, ҫула тухма яланах хатӗр пулнӑ.
Хастар ӗҫшӗн Михаил Николаевич «Раҫҫей кооперацинче тӳрӗ кӑмӑлпа ӗҫленӗшӗн» паллӑна, «Центросоюз. Потребительсен кооперацине 190 ҫул» медале тата ытти нумай наградӑна тивӗҫнӗ. Тивӗҫлӗ канура пулин те вӑл паян та руль умӗнче. «Торговый дом» ОООра тӑрӑшать.
Антонина Ивановна ҫамрӑклах райпон хатӗрлев кантурӗнче вӑй хума пуҫланӑ. Ӗҫленӗ вӑхӑтрах бухгалтера вӗренсе тухнӑ. Вӑл тӑрӑшнӑ вӑхӑтра райпо халӑхран нумай продукци пуҫтарнӑ. Кӗркунне ҫӗрулми тата пахчаҫимӗҫ сутакансем нумай пулнӑ. Кунсӑр пуҫне хатӗрлевҫӗсем хут-хӑмӑр, эмел курӑкӗсем, ҫӑм, тир тата ытти япаласем те йышӑннӑ. Бухгалтери ӗҫченӗсен вӗсене пурне те шута илмелле, укҫа-тенкӗ виҫине палӑртмалла пулнӑ. А.Лепешкина хатӗрлев кантурӗнче 1993 ҫулччен тӑрӑшнӑ. Кайран райпо системинче 2021 ҫулччен вӑй хунӑ. Пӗтӗмӗшле ӗҫ стажӗ унӑн 38 ҫулпа танлашать. Вӑл ӗҫри ӳсӗмсемшӗн «Потребкооперацин тава тивӗҫлӗ ӗҫченӗ» хисеплӗ ята тивӗҫнӗ. Антонина Ивановнӑн тата ытти тӗрлӗ шайри наградисем те нумай.
Лепешкинсем райпора ӗҫлесе халӑх ыйтӑвне тивӗҫтерес тесе тӑрӑшнипе пӗрлех килти хуҫалӑхра ӗҫлеме те, ача-пӑча ӳстерме те вӑхӑт тупнӑ. Вӗсем чӑннипех те ырӑ сӑмаха тивӗҫлӗ.
Юрий Гаврилов.