Пыл спасӗ ҫитсен пирӗн округра ҫак техӗмлӗ те усӑллӑ ҫимӗҫе халалласа мероприяти йӗркелесси йӑлана кӗчӗ ӗнтӗ. Кӑҫал «Вкус меда» фестиваль августӑн 18-мӗшӗнче иртрӗ.
Пыл пирки пирӗн мӑн несӗлсемех пӗлнӗ. Ӗмӗрсем хушши хурт-хӑмӑр ӗрчетес ӗҫ йӑхран-йӑха куҫса пынӑ. Пирӗн тӑрӑхра пурӑнакансем те ӗлӗкренех вӗлле хурчӗсем тытнӑ. Халӗ вӗсен ӗҫне тӑсакансем пур. Хурт-хӑмӑр отраслӗ малалла та аталантӑр, халӑх сиплӗ ҫимӗҫе тутанса пӑхса туянма пултартӑр тесе йӗркеленӗ те ҫак фестивале.
— Пирӗн округра пыл хурчӗпе ӗҫлекен сахал мар. Икӗ-виҫӗ хурт ҫемйи тытакансем нумайӑн-ха. Ҫавӑн пекех 20 ҫын хурт-хӑмӑрпа уйрӑм предприниматель пек тӑрӑшать. «Асаново» ял хуҫалӑх кооперативӗнче, «Искра», «Урожай» колхозсенче утарсем пур. Вӗлле хурчӗсем тытакансемпе эпир час-часах тӗл пулса калаҫма тӑрӑшатпӑр. Хурт-хӑмӑр ӗрчетесси — хӑй пысӑк наука. Утарҫӑсем нумай пӗлсен те, вӗренмелли, пӗр-пӗрин опычӗпе паллашмалли пур, — каласа парать округри хурт-хӑмӑр енӗпе ӗҫлекен М.Г.Пильщикова специалист.
Фестивале уҫса саламланӑ май округри депутатсен Пухӑвӗн председателӗ С.Н.Грачева, округ пуҫлӑхӗн социаллӑ ыйтусемпе ӗҫлекен ҫумӗ Н.А.Комиссарова, Комсомольски территори уйрӑмӗн начальникӗ М.А.Илларионова та пыл усси тата вӗлле хурчӗсене пӑхакансен пархатарлӑ ӗҫӗсем ҫинчен нумай ырӑ сӑмах каларӗҫ. Фестивале хутшӑнакан хастар хурт-хӑмӑрҫӑсене Тав ҫырӑвӗсемпе чысларӗҫ.
Иртнӗ ҫулсенчи пекех, фестивальте пыл ассортименчӗ пуян пулчӗ. Яланхиллех Л.Н.Пурлушкин, А.Н.Львов, А.П.Степанов, Г.Н.Крылов, В.А.Тихонов, Р.В.Яковлева, М.Г.Пильщикова хурт-хӑмӑрҫӑсен продукцийӗпе пуҫтарӑннисем хапӑлласах паллашрӗҫ. Вӗсем хӑйсемпе пӗрле тӗрлӗ йывӑҫ-курӑкран пуҫтарнӑ пыла ҫеҫ мар, вӗлле хурчӗсен ытти продукцине те илсе килнӗ. Пыл пин тӗрлӗ чиртен пулӑшать теҫҫӗ те, унран хатӗрленӗ эмелсемпе им-ҫам та, тӗрлӗ препаратсем те пулчӗҫ фестивальте. Николай Пурлушкинпа ывӑлӗ Леонтий тутлӑ пылпа ҫеҫ мар, хӑйсем ҫитӗнтернӗ пыл пек пылак арбузпа дыня та тутанса пӑхма сӗнчӗҫ. Каларӑмӑр ӗнтӗ, пирӗн округра хурт-хӑмӑрпа интересленекен чылай. Фестивале ялан хутшӑнакансем хушшинче малашне ялсенчи пултаруллӑ та ӑста ытти хурт-хӑмӑрҫа та курасчӗ, вӗсен продукцийӗпе те паллашасчӗ.
Кӑҫалхи пыл уявне Ульяновск облаҫӗнчи В.Г.Сафуков та хутшӑнма кӑмӑл тунӑ.
— Чӑваш Енри, Тутарстанри, хамӑр тӑрӑхри пыл уявӗсене тӑтӑшах хутшӑнма тӑрӑшатӑп. Комсомольскинчи фестивальте пӗрремӗш хут. Кунта мана кӑмӑла кайрӗ. Мероприятие фестиваль ят панӑ пулсан вӑл юрӑллӑ-ташӑллӑ пулмалла, — терӗ те, хӗрарӑмсене кӗвӗ ҫеммипе ташша чӗнсе округри культура ӗҫченӗсемпе пӗрле уява сӑн кӗртрӗ. «Салам» ушкӑн, «Каҫал» фольклор ансамблӗ, уйрӑм юрӑҫсем уява килнисене савӑнӑҫлӑ кӑмӑл-туйӑм парнелес тесе тӑрӑшрӗҫ.
Юрий Гаврилов.