Пирĕн чи юратнă ватă инке — Клавдия Ивановна Такмакова. Вăл 1928 çулта январь уйăхĕнче çут тĕнчене килнĕ. Çемьере çиччĕн ÿснĕ. Чи асли вара — Клавти. Кил-çурт тирпейлĕхĕ те, йăмăкĕсемпе шăллĕне пăхасси те, апат хатĕрлесси те ун çинче пулнă. Вĕсен тĕп килĕ Тукай ялĕнче вырнаçнă. Клавти 8 çул тултарсан пĕрремĕш хут парта хушшине ларнă. Класра 38 ача пулнă. Вĕсене 4 класс пĕтерсен Варвара Константиновна алă ĕçĕсем тума тата улма кăларма вĕрентнĕ.
1938 çулта Клавти колхозра ĕçлеме тытăннă. Çамрăк хĕрача вăйпитти çынсемпе пĕрле çурлапа тырă вырнă.
1941 çулхи июнĕн 22-мĕшĕнче хире вир çумлама кайнă çынсене вăрçă пуçланни çинчен пĕлтернĕ. Çак çулсенче вĕсем шкултах пурăннă. Çĕр улмирен тата тĕрлĕ курăкран апат хатĕрленĕ. Хĕл сиввисенче ашшĕпе пĕрле вăрман касма кайни те пулкаланă. Çамрăк хĕр арçынсене апат пĕçерсе çитернĕ. Вăрçă хыççăн вăл тĕрлĕ тăрăхра ĕçленĕ: торф кăларнă, вакунсем пушатнă, кирпĕч заводĕнче те вăй хунă. Ялта арканнă хуçалăхсене йĕркене кĕртме пулăшнă. Паянхи кун вара Клавдия Ивановна çамрăксене телейлĕ, мирлĕ пурнăç сунать.
1955 çулта Тукай ялĕн каччипе Гевросий Гаврилович Такмаковпа çемье çавăрнă. Çак çулсенче чăвашсем çемйисемпе Çĕпĕре куçса кайнă. Такмаковсем те 1964 çулта тăван ялпа сыв пуллашнă. Анчах та чун-чĕри чăваш çĕрĕшĕн çуннипе каялла таврăннă. Тивĕçлĕ канăва тухичченех колхозра ĕçленĕ. Инке «Ĕç ветеранĕ» ята тивĕçнĕ. Шел, Такмаковсен ачисем пулман. Мăшăрĕ 2005 çултах çĕре кĕнĕ.
Паянхи кун ватă пирĕнпе савăнса пурăнать. Юратнă инке 92 çул тултарчĕ. Вăл пирĕншĕн асанне вырăнĕнчех. Хăй тума пĕлекен алă ĕçĕсене вĕрентет, тĕрлĕ сĕнÿ-канаш парать, çĕршыва юрăхлă çынсем пулма пиллет. Çулĕсем сахалах мар пулсан та куçлăхсăрах алса-чăлха, тутăр, тапочкă, кофта çыхать. Унăн алли ылтăн! Пиçсе тухнă кукăлĕсене тутанса пăхнă чухне вара чĕлхене çăтса ярас марччĕ тесе çиетĕп. Пахчари ĕçсене те хăех майĕпен кăштăртатса пурнăçлать. Пирĕнпе пĕрле шăкăл-шăкăл калаçса ĕçлет.
Инке патне тăсăлакан сукмака тата нумай çул такăрлатасчĕ. Унăн кил ăшшийĕ нихăçан та ан сивĕнтĕр!
А.МАТРОСОВА.