Интернетра яланах пĕрле

Интернетра яланах пĕрле

Планшетпа телефона сехечĕ-сехечĕпе алăран яман ачасем хăйсем Интернет серепине лекнине тавçăрмаççĕ те.
Интернет уçлăхĕнчен еплерех сыхланмалла, çитĕнсе пыракан ăрăвăн психикине хавшатасран еплерех упрамалла? Çакă тата ытти ыйту нумай ашшĕ-амăшне шухăшлаттарать. Тĕпчевçĕсем 6—7 çулччен ачана компьютерпа 10—15 минутран ытла лартма сĕнмеççĕ. 8—12 çултисене — 30 минут, 13—14-рисене — 1 сехет, 14 çултан аслăраххисене 1 сехет те 30 минут лартма сĕнеççĕ.
Шкул ачисене уроксем хатĕрленĕ чух компьютер кирлине шута илсен çак вăхăт сахалрах мар-ши? Психологсем çапла тума та сĕнеççĕ, 1 сехете социаллă сетьре ларма е ырă вăйă выляма, мультфильм курма уйăрма пулать. Ашшĕ-амăшĕ ачисемпе пĕрле вылясан меллĕрех те. Тепĕр сехетне вара уроксене пурнăçлама уйăрмалла.
Мĕнле хăрушлăх пытаннă Интернетра? Унта арлă-арăм хутшăнăвĕпе, терроризмпа, экстремизмпа, сектăсемпе çыхăннă информациллĕ сайтсем чылай. Çавăнпа та аслисен кĕçĕннисем мĕнле сайтсене кĕнипе, камсемпе çыхăну тытнипе кăсăкланмалла. Вĕсене хăйсем тĕллĕн Интернетра ларма ирĕк те памалла мар. Вăхăтра асăрханни инкек курасран сыхлĕ.
Р.ЖУКОВА,
çул çитмен çамрăксемпе ĕçлекен уйрăм инспекторĕ.

Добавить комментарий

Ваш адрес email не будет опубликован. Обязательные поля помечены *